Кант шаарынын Жаштар аллеясында эки жаңы арт-объектти — «Тоос» жана «Комузду» орнотуу иштери аяктап калды, деп билдирет шаардык мэриянын басма сөз кызматы. Жаңы инсталляциялар аллеяда буга чейин орнотулган «Периште канаты» жана «Сардал кыз» арт-объекттерин толуктайт.

Муниципалитеттен билдиришкендей, «Тоосту» жасоо идеясы Кант шаарынын мэри Улан Майлибашевдин Кытайга болгон жумушчу сапары учурунда пайда болуп, ал жакта арт-объекттин баштапкы эскизин даярдаган.

«Кытайда тоос кушу бакубатчылыктын символу катары саналып, ийгиликти жана өнүгүүнү билдирген феникс кушу менен байланыштырылат. Биз Кантты абдан жакшы көрөбүз жана шаарыбыздын өсүп-өнүгүшүн, ал эми тургундарын дайыма бакубатчылык жана ийгилик коштоп жүрүшүн каалайбыз», — деп айтылат маалыматта.

«Тоос» инсталляциясынын бийиктиги 5 метрди, туурасы 4,5 метрди түзөт. «Комуздун» бийиктиги 4,3 метрге, ал эми туурасы 2,5 метрге жетет.

Эки конструкция тең сырткы жана ички жарыктандыруу менен жабдылган, мунун аркасында арт-объекттер түнкүсүн (караңгы киргенде) жарык берип турат.

Орнотуу (монтаждоо) иштерин 31-августка чейин аяктоо пландалууда.