Мамлекеттик салык кызматы банк секторунун жана Кыргызстандын Банктар союзунун өкүлдөрү менен жумушчу жолугушуу өткөрдү. Талкуунун негизги темасы салык мыйзамдарына киргизилген «Транзакцияга салык» атайын салык режимине тиешелүү өзгөртүүлөрдү ишке ашыруу болду.

2025-жылдын 31-декабрындагы мыйзамга ылайык, транзакцияга салыктын ставкасы 0,2%дан 0,1%га чейин төмөндөтүлгөн. Жолугушуунун катышуучулары бул салыкты администрлөөнү автоматташтыруу механизмдерин жана банктар менен салык кызматынын өз ара аракеттенүүсү үчүн санариптик сервистерди түзүүнү талкуулашты.

Иш жүзүндө бул кандай иштейт?

Ишкерге салыкты өз алдынча эсептөөнүн же татаал отчетторду толтуруунун кажети жок. Банк ортомчу катары чыгат: акча которуу (транзакция) жүргөндө, банк дароо өзү 0,1%ды эсептеп чыгып, аны бюджетке жөнөтөт. Бул автоматтык түрдө ишке ашат.

Бул салык режиминин өз эрежелери бар:

• Транзакциялар гана. Эгер сиз бул режимди тандасаңыз, каржылык операциялар менен гана алектене аласыз. Бул салык менен катар Кыргызстанда башка ар кандай бизнести жүргүзүүгө тыюу салынат.
• Кыска мөөнөт. Бул ставка боюнча иштөө үчүн катталган жери боюнча салык органына 2026-жылдын 1-февралына чейин арыз берүүгө жетишүү керек.