Эми «Менин шаарым» мобилдик тиркемеси аркылуу шаарлар аралык жүргүнчү ташуу каттамдарына электрондук билеттерди онлайн режиминде сатып алууга мүмкүнчүлүк түзүлдү. Бул тууралуу Бишкек мэриясы кабарлады.

Билет алуу үчүн тиркеменин «Кызматтар» бөлүмүнөн тиешелүү кызматты тандоо керек. Колдонуучулар багытты, сапардын күнүн жана транспорттогу каалаган ордун тандай алышат. Төлөм аткарылгандан кийин электрондук билет тиркемеде сакталат жана аны унаага отурганда көрсөтүү жетиштүү.

Мэрия бул кызмат жүргүнчүлөрдүн убактысын үнөмдөө жана санариптик кызматтарды өнүктүрүү максатында ишке киргизилгенин маалымдады. Тиркемедеги электрондук кызматтардын тизмеси келечекте дагы кеңейтилет.