Чүйдүн Сокулук районунда 18 жаштагы кызды ала качууга шектелип, эки жигит кармалды. Бул тууралуу облустук милициядан билдиришти.

Окуя кечээ, 13-январда, болгон. Жабырлануучунун айтымында, түнкү саат 00:30дар чамасында өзү менен чала тааныш «Н» аттуу жаран таанышы менен келип, анын эркине каршы никеге туруу максатында, “Step Wagon” үлгүсүндөгү автоунаага күчтөп отургузуп, уурдап кетишкен.

Бул факты боюнча Кылмыш-жаза кодексинин “Никеге туруу максатында ала качуу” беренеси менен кылмыш иши козголуп, милиция кызматкерлери шектүүлөрдү: 24 жаштагы Б.Н. жана 23 жаштагы Ш.Н. аттуу жарандарды кармады. Учурда алар убактылуу кармоочу жайга киргизилди. Тергөө уланууда.