Бүгүн, 21-январда, “Жылдын мыкты мугалими – 2025” сынагынын жеңүүчүсү Элзат Асановага Бишкек шаарынан бир бөлмөлүү батирдин ачкычы берилди. Бул тууралуу Агартуу министрлиги билдирди.

Элзат Асанова Ысык-Көл облусунун Түп районундагы К. Үмүталиев атындагы №22 Долон жалпы билим берүү мектебинде кыргыз тили жана адабияты мугалими болуп эмгектенет. Ал сынактын райондук жана облустук этаптарынан өтүп, республикалык турда баш байгени утуп алган.

Беш баланын энеси Элзат Асанова аталган турак жай балдарынын келечектеги билим алуусу үчүн колдонуларын билдирди.