Орус өкмөтү 2026-2027-окуу жылында Орусиянын жогорку окуу жайларында окуу үчүн Кыргызстандын жарандарына 700 бюджеттик квота бөлгөн. ЖОЖдорго тапшыруу үчүн документтерди кабыл алуу ушул жылдын 15-декабрга чейин уланат. Бул тууралуу «Россотрудничествонун» Кыргызстандагы өкүлчүлүгү кабарлады.

Маалыматка ылайык, бул квоталарга мектеп бүтүрүүчүлөрү тапшырган бакалавриат жана специалитет программалары менен катар, ЖОЖдорду бүтүргөндөр үчүн магистратура, аспирантура, ординатура, ассистентура-стажировка жана квалификацияны жогорулатуу программалары да кирет.

Тапшырууну каалагандар арыздарды жана бардык документтерди онлайн түрдө education-in-russia.com сайтына тапшыра алышат. Бул сайттан бардык кызыктырган маалыматтарды алууга болот.

Тест тапшыруу (мектеп жана колледж бүтүрүүчүлөрү үчүн) да онлайн форматта өтөт. ЖРТ же ЕГЭ тапшыруу талап кылынбайт. Абитуриенттер 6 жогорку окуу жайды, анын ичинде 450дөн ашык кесиптерди жана даярдоо багыттарын тандай алышат. Кабыл алуу, консультациялар, тестирлөөлөр – баары акысыз.

Кабыл алуу дээрлик бардык техникалык, инженердик, чыгармачыл, социалдык-гуманитардык, педагогикалык, медициналык, айыл чарба жана башка адистиктер боюнча жүрөт.