4-мартта Кыргыз Республикасынын Коопсуздук кеңешинин катчысы Адилет Орозбеков мамлекеттик кызматкерлерге квалификациясын жогорулатуу тууралуу күбөлүктөрдү тапшырды. «Автоматташтырылган тутумдардын маалыматтык коопсуздугу» багыты боюнча окуудан түрдүү министрликтердин жана ведомстволордун адистери өтүштү.

Кадрларды даярдоо ЖККУга мүчө мамлекеттердин кызматташтыгынын алкагында Россиянын «МИФИ» Улуттук изилдөө ядролук университетинин базасында жүргүзүлдү.

Салтанаттын жүрүшүндө Адилет Орозбеков маалыматтык мейкиндикти коргоо жамааттык коопсуздук тутуму үчүн артыкчылыктуу багытка айланганын баса белгиледи. Бул иштин негизги куралы — туруктуу негизде жүргүзүлүп жаткан «ПРОКСИ» операциясы болуп саналат.

Бул — санариптик чөйрөдөгү кылмыштарды аныктоого жана бөгөт коюуга багытталган ЖККУнун ыкчам-алдын алуу иш-чараларынын циклы. Даярдалган адистер төмөнкү коркунучтарга каршы турууга тартылат:

• электрондук алдамчылык жана акча каражаттарын адалдоо;
• интернет-каналдар аркылуу баңгизаттарды, курал-жарактарды мыйзамсыз жүгүртүү жана адам сатуу;
• мыйзамсыз миграцияны уюштуруу;
• зыяндуу программаларды жана тыюу салынган контентти жайылтуу.

Коопсуздук кеңешинин катчысы транспорттон баштап саламаттык сактоого чейинки жашоонун бардык тармактарына санариптик технологиялардын киргизилиши мүмкүнчүлүктөрдү гана эмес, олуттуу тобокелдиктерди да жаратарын белгиледи. Анын айтымында, «ПРОКСИ» операциясы мамлекеттердин коопсуздугуна зыян келтирүүчү маалыматтардан улуттук жана союздаштык кызыкчылыктарды коргоого багытталган.

Бул стратегияны калыптандыруудагы маанилүү этап 2025-жылдын май айында Кыргызстанда өткөн ЖККУнун киберкоопсуздук боюнча биринчи Эл аралык конференциясы болду. Дал ошондо так артыкчылыктар аныкталып, анын негизинде азыркы тапта кадрларды даярдоо жана коргоо чараларын ишке ашыруу жүрүп жатат.

Соңунда Адилет Орозбеков программанын бүтүрүүчүлөрүн кесиптик чеберчилигин тынымсыз жогорулатууга чакырып, алардын иши санариптик доордо өлкөнүн туруктуулугунун жана гүлдөп-өнүгүшүнүн пайдубалы экенин белгиледи.