Кыргызстандын Аскердик прокуратурасы өзгөчө кырдаалдар мурдагы министри Урматбек Шамыркановго карата расмий түрдө иликтөө иштерин баштады. Кылмыш иши ӨКМдин офицеринин пара талап кылуу боюнча берген арызынын негизинде козголду.

Көзөмөл органынын маалыматына караганда, тергөө Урматбек Шамырканов министрдин орун басары кызматын аркалап турган 2025-жылдагы фактыларды текшерүүдө. Ведомствонун жабыркаган кызматкеринин арызына ылайык, ошол кездеги министрдин орун басары кызматтан көтөрүү үчүн акчалай каражат алган болушу мүмкүн.

Бүгүн эртерээк Президенттин администрациясы Башкы прокуратуранын текшерүүсү арыз ээсинин жүйөлөрүн тастыктаганын, бул Шамыркановду кызматтан токтоосуз бошотууга себеп болгонун билдирген. Белгилей кетсек, ал министрлик кызматта бир айга жетпеген убакыт — үстүбүздөгү жылдын 19-февралынан бери гана иштеп келген.

Учурда Аскердик прокуратура тергөө амалдарын жүргүзүүдө, анын жыйынтыгы боюнча иштин бардык катышуучуларынын аракеттерине укуктук баа берилет.

Эгерде пара талап кылуу же пара алуу фактылары сотто далилденсе, шектүүгө төмөнкүдөй жазалар берилиши мүмкүн:

• 10 жылдан 12 жылга чейинки мөөнөткө эркинен ажыратуу;
• мүлкүн конфискациялоо;
• мамлекеттик кызматтарды ээлөө укугунан өмүр бою ажыратуу.

Эскерте кетсек, бүгүн ӨКМ башчысынын милдетин аткаруучу болуп Канатбек Чыныбаев дайындалды, анын талапкерлиги буга чейин эле Жогорку Кеңешке макулдашуу үчүн жөнөтүлгөн.