Баткен облусунун бир нече районунда жана Жалал-Абад облусунун Манас шаарында сел жүрдү. Эң оор кырдаал Манас шаарында түзүлүп, ал жакта кечээ саат 22:40тар чамасында тоо капчыгайларынан баткак аралаш сел каптап түшкөн.

Табият кырсыгынын кесепетинен 4 социалдык объект жана 39 турак үй зыян тартты. Сел суулары 16 үйдүн ичине кирип, 23 үйдүн короосун каптаган. Учурда кырсык болгон жерде 229 адам иштеп жатат, атайын техника тартылган. ӨКМ башчысы кесепеттерди жоюу иштерин жеке өзү координациялоодо.

Баткен облусунун Кадамжай районунда сел ички жолдордун бирин тосуп калды. Ал жакта турак үйлөргө жана социалдык объекттерге зыян келтирилген эмес, адистер жеринде иш алып барууда.