Reporter.kg маалымат агенттиги жана «Кыргызстан аэропорттору» ААК өз ара түшүнүшүү жөнүндө меморандумга кол коюу менен өнөктөштүк мамилелерин расмий түрдө бекемдешти. Документке «Кыргыз Медиа Групп» медиахолдингинин башкы директору Владимир Банников жана «Кыргызстан аэропорттору» ААК башкармалыгынын төрагасы Манасбек Самидинов кол коюшту.

Узак мөөнөттүү келишим авиация тармагын сапаттуу маалыматтык коштоону өнүктүрүүгө жана республиканын туристтик имиджин чыңдоого багытталган. Тараптар авиаинфратүзүмдүн өнүгүшүн, жаңы эл аралык каттамдардын ачылышын жана жүргүнчүлөр үчүн тейлөөнүн сапатын жогорулатууну чагылдырган бир катар биргелешкен медиадолбоорлорду ишке ашырууну көздөшүүдө.

Меморандумдун алкагында төмөнкүлөр пландалууда:

• аналитикалык материалдарды жана репортаждарды даярдоо;
• өлкөнүн негизги аэропорттору тууралуу мультимедиялык контентти түзүү;
• транспорт жана туризм чөйрөлөрүндөгү мамлекеттик демилгелерди чагылдыруу.

«Кыргызстан аэропорттору» ААК башкармалыгынын төрагасы Манасбек Самидинов авиация өлкөнүн ачыктыгында өтө маанилүү ролду ойной турганын баса белгиледи.

«Инфратүзүмдү заманбапташтыруу жана учуулардын географиясын кеңейтүү экономика үчүн жаңы мүмкүнчүлүктөрдү түзөт. Бул процесстердин кесипкөй маалыматтык коштоого ээ болушу жана кеңири аудиторияга түшүнүктүү болушу маанилүү», — деди ал.

Reporter.kg маалымат агенттигинин башкы директору Владимир Банников заманбап медиа өлкөнүн имиджин калыптандыруунун негизги куралы болуп саналарын кошумчалады.

«Сапаттуу контент аркылуу биз Кыргызстандын авиациясы кантип өнүгүп жатканын жана ал туристтер менен инвесторлор үчүн кандай мүмкүнчүлүктөрдү ачып жатканын көрсөтө алабыз», — деди медиахолдингдин жетекчиси.

Тараптар жаңы каттамдардын ачылышынан баштап, эл аралык форумдарды өткөрүүгө чейинки маанилүү тармактык окуяларды биргелешип чагылдырууну көздөшүүдө. Борбордук Азиядагы келечектүү транзиттик жана туристтик борбор катары Кыргызстанды тааныткан долбоорлорго өзгөчө көңүл бурулат.