30-апрелден 2-майга чейин күтүлүп жаткан жаан-чачынга байланыштуу Ош, Жалал-Абад, Баткен, Нарын жана Ысык-Көл облустарынын тоолуу жана тоо этектериндеги райондорунда сел жүрүүсү мүмкүн. Дарыяларда суунун деңгээли көтөрүлүшү күтүлөт. Бул тууралуу Өзгөчө кырдаалдар министрлиги эскертти.

Ошондой эле 1-майдан 6-майга чейин жаан-чачынга жана температуранын жогорулашына байланыштуу тоолуу райондордо, анын ичинде Балыкчы-Казарман-Жалал-Абад унаа жолунун Көк-Арт ашуусунда жана Каракол-Эңилчек унаа жолунун Чоң-Ашуу ашуусунда кар көчкү түшүүсү жана кар күрткүсү күтүлөт.

Жолдордо муз тоңуп, тайгак болот. Мекеме унаалардын ортосунда 500 метрлик аралыкты сактоо зарыл экенин билдирди.