2026-жылдын 27-апрелинен 28-апрелине чейин Бишкекте КР коргоо министринин кубогуна армиялык кол уруш боюнча Кыргызстандын чемпионаты болуп өттү.

Өлкөнүн бардык аймактарынан эң күчтүү спортчуларды бириктирген мелдешке 300дөн ашуун адам, ошондой эле Коргоо министрлигинин, ИИМдин, Чек ара кызматынын, Юстиция министрлигине караштуу Жаза аткаруу кызматынын (ЖАК) аскер бөлүктөрүнүн 20дан ашык курама командалары жана Кыргызстандын бардык облустарынан келген жарандык командалар катышты.

КР Армиялык кол уруш жана өзүн-өзү коргоо федерациясынын калыстар коллегиясынын төрагасы, улуттук категориядагы калыс, спорт чебери Иманбек Касымов Reporter.kg басылмасына билдиргендей, чемпионат жыл сайын өткөрүлөт, бирок Коргоо министрлиги менен биргеликте ведомство башчысынын кубогуна бул экинчи турнир.

Анын айтымында, Кыргызстандын чемпионаты июнь айында өтө турган ЖККУга (ОДКБ) мүчө өлкөлөрдүн армиялык кол уруш боюнча чемпионатынын, ошондой эле Дүйнө чемпионатынын тандап алуу туру болуп саналат.

«Турнир катышуучулардын жогорку деңгээлдеги чеберчилигин, эрк-кайратын, тартибин жана чыныгы спорттук мүнөзүн көрсөткөн жаркын аянтча болду», — деди Касымов.

Мелдештин жыйынтыгы боюнча жалпы командалык эсепте орундар төмөнкүдөй бөлүштүрүлдү:
1-орун — 52806 аскер бөлүгүнүн командасы;
2-орун — КР Куралдуу Күчтөрүнүн Аскердик институтунун командасы;
3-орун — КР ИИМдин Академиясынын командасы.