Бишкектин Ак-Босого конушунда терек таарычысынын (тополевый пилильщик) кескин көбөйүшү катталып, анын личинкалары дарактарды жабыркатты. «Бишкекжашылчарба» муниципалдык ишканасынын башкы агроному Жаныбек Жумалиев Reporter.kg басылмасына түзүлгөн кырдаал жана курт-кумурскалар менен күрөшүү чаралары тууралуу айтып берди.

Буга чейин социалдык тармактарда №46 мектептин жанындагы арык лотокторунда жана тротуарда теректердеги тирүү личинкалардын көп экенин көрсөткөн видео тараган.

Жаныбек Жумалиев түшүндүргөндөй, терек таарычысы негизинен кара теректерди жабыркатат, ал эми дарактардын башка түрлөрү зыян тартпайт. Анын айтымында, жаздын башында ургаачы курт-кумурскалар теректин жалбырактарына жумуртка таштайт, андан кийин личинкалар пайда болуп, жалбырактын сырткы кабыгын калтырып, ички бөлүгүн жеп салышат.

Өнүгүүнүн белгилүү бир баскычында личинкалар жерге түшөт, ал жерде 5–10 сантиметр тереңдикте куурчакчага айланып, кийинки жазга чейин калышат.

Жумалиев белгилегендей, терек таарычысы — жергиликтүү зыянкеч, бирок айрым жылдары анын саны кескин көбөйүп кетет, муну алдын ала айтуу кыйын. Быйыл ушундай жагдай Ак-Босого конушунда орун алды.

Учурда «Бишкекжашылчарба» ишканасынын адистери кырдаалды көзөмөлгө алышты.

«Зыянкечтердин санын азайтуу жана андан ары жайылышын алдын алуу үчүн комплекстүү коргоо иш-чараларын өткөрүү пландаштырылууда, анын ичинде жашыл шиберлерди минирлөөчү курт-кумурскаларга каршы натыйжалуу заманбап тутумдуу препараттар менен иштетүү каралган. Жумуштар бардык санитардык ченемдерди жана коопсуздук талаптарын сактоо менен оптималдуу агротехникалык мөөнөттөрдө жүргүзүлөт», — деп айтылат маалыматта.

«Бишкекжашылчарба» ишканасы тургундарды тынчсызданбоого жана жүргүзүлүп жаткан иш-чараларга түшүнүү менен мамиле кылууга чакырат. Кырдаал көзөмөлдө, зарыл чаралар пландуу тартипте көрүлүүдө деп кошумчалашты ишканадан.

Терек таарычысы (айрыкча, Stauronematus platycerus же минирлөөчү Fenusella) — теректин жалбырактары менен азыктанып, алардын саргайышына, галлдардын (шишиктердин) пайда болушуна, минирлөөгө (ичинен жеп салууга) жана жалбырактардын мөөнөтүнөн мурда түшүүсүнө алып келген коркунучтуу зыянкеч. Бул зыянкеч сейил бактардагы бак-дарактарды, өзгөчө бальзамдуу теректи массалык түрдө жабыркатып, дарактардын кооздугун (декоративдүүлүгүн) төмөндөтөт.