Жогорку Кеңештин төрагасы Марлен Маматалиев жана депутат Нуржал Төрөбекова никеге туруп жаткан адамдар үчүн милдеттүү жана акысыз медициналык текшерүүдөн өтүүнү караган мыйзам долбоорун иштеп чыгышты.

Негиздеме-маалымкатка ылайык, Кыргызстанда жугуштуу оорулар, атап айтканда, В, С жана D вирустук гепатиттери, ошондой эле ВИЧ-инфекциясы актуалдуу бойдон калууда.

«Бул оорулар көп учурда симптомсуз өтөт, кан жана биологиялык суюктуктар аркылуу жугат жана дарыланбаган учурда боордун циррозуна жана рагына чейинки оор кесепеттерге алып келиши мүмкүн», — деп айтылат документте.

Авторлор көпчүлүк жарандар өзүнүн инфекциялык статусу жөнүндө билишпей турганын, бул үй-бүлө ичинде илдетти жугузуп алуу учурларына алып келерин белгилешет. Ошол эле учурда колдонуудагы мыйзамдар никеге чейин медициналык текшерүүдөн өтүүгө милдеттендирбейт, болгону мүмкүнчүлүк гана берет.

Демилгечилер никеге тургандар үчүн В, С жана D вирустук гепатиттерине, ВИЧке жана венерикалык ооруларга тест тапшырууну камтыган милдеттүү жана акысыз медициналык текшерүүнү киргизүүнү, ошондой эле жыйынтыктардын купуялуулугун камсыздоону сунуштап жатышат.

Текшерүүнүн жыйынтыктары медициналык сыр статусунда сакталат жана жарандардын өздөрүнүн макулдугу менен гана ачыкталат. Эгерде жубайлардын бири оорусу бар экенин жашырып койсо, экинчиси сот аркылуу никени жараксыз деп табууга укуктуу болору такталган.

Бул чаралар инфекциялардын жайылышын азайтууга, үй-бүлө куруудагы жоопкерчиликти жогорулатууга жана келечек муундардын ден соолугун коргоого жардам берет деп эсептешет авторлор.

«Жарандык абалдын актылары жөнүндө» мыйзамына өзгөртүүлөрдү киргизүү, тактап айтканда, никени каттоодо текшерүүнүн жыйынтыгы тууралуу маалымкатты милдеттүү түрдө көрсөтүү тартибин орнотуу сунушталууда.