Бишкек шаарынын Төмөнкү Ала-Арча аймагындагы «Көк-Сай» курулуш базарында чыккан өрт толугу менен өчүрүлдү. Бул тууралуу Өзгөчө кырдаалдар министрлиги (ӨКМ) билдирди.

Белгилей кетсек, өрт кечээ, 6-августта, кечинде башталган. Өрт тууралуу маалымат ӨКМга саат 22:48де түшкөн. Жалын түнкү 01:23тө чектөөгө алынып, бүгүн, 7-август күнү, эртең мененки саат 09:06да толук өчүрүлдү.

Мекеменин маалыматында, тилсиз жоо пластик терезе жана эшик чыгаруучу цехти каптап, кийин курулуш материалдары сакталган кампаларга өткөн. Өрттү өчүрүүгө жалпы 6 бөлүм жана штаб тартылган.

Өрттүн жалпы аянты болжол менен 500 чарчы метрди түздү. Окуянын кесепетинен каза болгондор жана жабыркагандар жок. Учурда өрттүн келип чыгуу себептери такталууда.