Жогорку Кеңештин депутаты Дастан Бекешев министрлер кабинети Бишкектин 2050-жылга чейинки Башкы планына өзгөртүүлөрдү киргизгенин, бирок анын мазмуну коомчулукка белгисиз бойдон калып жатканын билдирди. Бул тууралуу ал өзүнүн Telegram-каналына жазды.

Эл өкүлүнүн айтымында, 27-октябрда минкаб борбор калаанын Башкы планынын негизги чиймесин өзгөрткөн № 721 токтомду кабыл алган. Бул документ турак жай, өнөр жай жана башка аймактардын жайгашуусун, ошондой эле шаардагы келечектеги курулуштардын параметрлерин аныктайт.

Бекешев 30-октябрда токтом «Эркин-Тоо» гезитине жарыяланганын, бирок өзгөртүүлөр камтылган тиркемеси жок экенин белгиледи. Ошондой эле депутат жаңыланган чиймени Бишкек мэриясынын жана Курулуш министрлигинин сайттарынан да таба алган эмес.

«Башкы планды өзгөртүп коюшту, ал эми так эмне өзгөргөнүн шаар тургундары биле алышпайт», — деп жазды ал.

Мындан тышкары, депутаттын айтымында, ал токтом долбоорунун коомдук талкуусу тууралуу маалыматты да тапкан эмес.

Бекешев мындай маанилүү документке киргизилген өзгөртүүлөр ачык талкууланышы керек деп эсептейт. Себеби борбор калаанын ар кайсы райондорунда кандай объектилер — турак үйлөр, мектептер, сейил бактар же жолдор пайда болору Башкы пландан көз каранды.

Буга байланыштуу эл өкүлү Курулуш министрлигине депутаттык суроо-талап жөнөтүү ниетинде. Ал кайсы аймактарга өзгөртүүлөр киргизилгени боюнча түшүндүрмө талап кылууну, чийменин мурдагы жана жаңыланган варианттарын суроону, ошондой эле эмне себептен коомдук талкуу жүргүзүлбөгөнүн тактоону пландаштырууда.

Мындан тышкары, депутат жаңыланган Башкы план Курулуш министрлигинин жана мэриянын расмий сайттарына качан жарыяланарын билүүгө ниеттенүүдө.

Бекешев «Бишкектин башкы планы бишкектиктердин өздөрү үчүн сыр (жашыруун) болбошу керек» деп баса белгиледи.