Ош облусунун бийик тоолуу Алай районундагы Жалпы дарыгерлик практика борбору (ЖДПБ) кадр тартыштыгы маселесин дээрлик толугу менен чечип, штаттын 95 пайызга толукталышына жетишти. Бул тууралуу КР Саламаттык сактоо министрлигинин басма сөз кызматы билдирип, бул жерде иштеген 96 медиктин 80 пайыздан ашыгын 40 жашка чейинки адистер түзөрүн баса белгиледи.

Алыскы районго жаштарды тартууда дарыгерлерди кызматтык турак жай менен камсыз кылуу жана Ош облусун өнүктүрүү фондунун эсебинен жатаканаларды оңдоо негизги ролду ойногон. Бул жакка ийгиликтүү көнүп кетүүнүн жаркын мисалы катары 2014-жылы Алайга келип, бул жерден өз үйүн куруп алган дарыгер Минура Каныбекованын үй-бүлөсүн айтса болот: медиктерди колдоо боюнча мамлекеттик саясаттын аркасында анын айлык кирешеси алгач иштеп баштагандагы 6,5 миң сомдон бүгүнкү күндө 73 миң сомго чейин өскөн.

Кадрдык потенциалды күчөтүү менен катар эле техникалык базаны заманбапташтыруу иштери да жүрүүдө: АРИС долбоору жана Япониянын Элчилиги менен кызматташуунун алкагында ЖДПБ эки жыл ичинде 20 млн сомдон ашык суммага заманбап медициналык жабдууларды алган. Учурда жеринде жогорку технологиялык жардам көрсөтүү үчүн МРТ аппараты менен жабдуу пландалып жаткан 200 орундуу жаңы оорукана комплексинин курулуш долбоору иштелип чыгууда.