10-июнда Ош шаарында 10 сквер пайдаланууга берилди. Шаар мэриясынын маалыматында, жаңы скверлердин жалпы аянты 2,57 гектарды түзөт.

Объектилерде тротуарлар төшөлүп, жарыктандыруу мамылары, отургучтар жана таштанды урналары орнотулган. Ошондой эле айрым аймактардагы көп кабаттуу үйлөрдүн фасаддары актап-сырдалган.

Жашыл аймактарды түзүү иштерин «Оштогу көрктөндүрүү жана жашылдандыруу чарба комбинаты» муниципалдык ишканасы аткарган. Н. Исанов көчөсүндөгү скверди жасалгалоого Кызыл Ай коому салым кошкон.

Шаар мэри Жанарбек Акаев скверлердин ачылышына катышып, жашылдандыруу иштери улантыларын жана дагы 10 скверди куруу боюнча чечим кабыл алынганын билдирген.