Жалал-Абадда 17 жаштагы кызды ур-токмокко алып, чачын жана кашын кырып кыйнаган деп шектелип, 38 жаштагы аял менен 20 жаштагы жигит кармалды. Бул тууралуу Жалал-Абад ОИИБдин басма сөз кызматы билдирди.

Милицияга М.К. аттуу тургун арыз менен кайрылып, 9-январга караган түнү анын 17 жаштагы кызын 3 адам эч бир себепсиз сабап, кашы менен чачын кырып кыйнаганын билдирген. Натыйжада жабырлануучу Өзгөн райондук ооруканасына жаткырылган.

Аталган факт боюнча Кылмыш-жаза кодексинин «Уруп-сабап кыйноо» беренеси менен кылмыш иши козголгон. Кылмышка шектүү кармалып, соттун чечими менен бир айга камалды.

Тергөөнүн жүрүшүндө шектүү аял мурда бейбаштык жана алдамчылык фактылары менен соттолгондугу аныкталган. Тергөө уланууда.