Эркин күрөш боюнча кыргызстандык балбан Эрназар Акматалиев Астана шаарында (Казакстан) өткөн спорттук күрөш боюнча дүйнө чемпионатында күмүш медаль тагынды.

Спортчу 70 килограммга чейинки салмак ченинде күч сынашты.

Акматалиев мелдештин 1/8 финалынан баштап, анда канадалык спортчуну утту. Ал эми чейрек финалда түркиялык балбанды жеңип алды.

Жарым финалда кыргызстандык спортчу 2023-жылдын дүйнө чемпиону, америкалык Зейн Резерфорд менен кез келди. Курч мүнөздө өткөн беттеште Акматалиев 3:2 эсебинде жеңишке жетип, финалга жолдомо алды.

31-октябрда чечүүчү беттеште анын атаандашы орусиялык Ибрагим Ибрагимов болду. Акматалиев 2:5 эсебинде жеңилип, 2-орунду ээледи жана дүйнө чемпионатынын күмүш медалынын ээси болду.