Чүйдө жаран аялынын ойношуна бычак сайган деп кармалды. Бул тууралуу облустук милициядан билдиришти.

Милициянын маалыматы боюнча, 2024-жылы ноябрда 45 жаштагы жаран (Т.С.) Instagram аркылуу бир аял менен таанышып, кийин ал экөөнүн ортосунда мамиле түзүлүп, интимдик байланыш болгон.

Көп узабай аны аялдын күйөөсү (Т.А.) билип калып, 16-январда ал берки эркек (Т.С.) менен Кара-Балтада жолуккан. Экөө сүйлөшүп турганда ал кызганычтан улам тиги эркекти көкүрөк тушка бычак сайган. Бычак жеген жаран ооруканага түшкөн.

Бул факт боюнча Кылмыш-жаза кодексинин 130-беренеси (ден соолукка оор залал келтирүү) боюнча кылмыш иши козголуп, шектүү катары аялдын 47 жаштагы күйөөсү (Т.А.) кармалган.

Учурда тиешелүү экспертизалар дайындалып, тергөө иштери уланууда.