Бишкекте 18-октябрда Швейцариянын La Landwehr de Fribourg оркестри менен Кыргызстандын Куралдуу Күчтөрүнүн (КР КК) оркестринин биргелешкен марш-парады болуп өттү. Бул тууралуу иш-чаранын уюштуруучулары билдиришти.

Европанын эң байыркы үйлөмө оркестрлеринин бири өз тарыхында алгачкы ирет Борбор Азияга келип, кыргыз борборунун тургундары менен конокторуна Швейцариянын музыкалык салтын тартуулаганы белгиленди.

Бул иш-чарага Швейцария парламентинин эки палатасынын бири — Федералдык жыйынынын Улуттук кеңешинин төрагасы жана La Landwehr de Fribourg оркестринин президенти Пьер-Андре Паженин (Pierre-André Page) Кыргызстанга келиши өзгөчө маани берди.

«Швейцариянын мындай жогорку деңгээлдеги саясий ишмеринин катышуусу маданий диалогдун, ошондой эле Кыргызстан менен Швейцариянын ортосундагы эки тараптуу мамилелерди чыңдоонун маанилүүлүгүн көрсөттү», — деп айтылат маалыматта.

Уюштуруучулардын маалыматына ылайык, музыкалык жүрүш шаардын борбордук көчөлөрү аркылуу — Эркиндик бульвары менен Ж. Бөкөнбаев көчөсүнүн кесилишинен башталып, КР Улуттук тарых музейине чейин өттү.

Эки оркестрдин биргелешкен өнөрү Кыргызстан менен Швейцариянын ортосундагы маданий алмашуунун жана достуктун символу болуп калды.

Иш-чаранын расмий бөлүгүндө Швейцариянын Кыргызстандагы элчиси Сироко Мессерли сөз сүйлөдү. Ал эки өлкөнүн ортосундагы маданий байланыштардын маанисин белгилеп, музыка тил жана улуттук чек араларды жоюуга жардам берерин баса белгиледи.

Элчи ошондой эле биргелешкен жүрүш үчүн КР КК оркестрине ыраазычылык билдирип, аны элдердин ортосундагы достуктун жана өз ара урматтоонун жаркын үлгүсү деп атады.

Өз кезегинде Швейцариянын Федералдык жыйынынын Улуттук кеңешинин төрагасы жана La Landwehr de Fribourg оркестринин президенти Пьер-Андре Паже адамдарды бириктирүүдө жана маданий байланыштарды бекемдөөдө музыканын өзгөчө ролу бар экенин белгиледи.

Ал өлкөлөр ортосундагы эң бекем мамилелер диалог, жеке жолугушуулар жана бири-биринин каада-салттары менен таанышуу аркылуу кураларын айтты.

Анын айтымында, Кыргызстан менен Швейцарияны маданий мурастарга, жергиликтүү каада-салттарга жана тоолуу аймактарга болгон терең урмат-сый бириктирип турат.

Reporter.kg маалымкаты: La Landwehr de Fribourg — 1804-жылы негизделген Фрибур кантонунун жана шаарынын расмий музыкалык жамааты. 220 жылдан ашык убакыттан бери оркестр мамлекеттик аземдерде, расмий кабыл алууларда жана эл аралык маданий иш-чараларда ойноп, Швейцариянын музыкалык салттарын сактап жана өнүктүрүп келет.

Алдыдагы иш-чаралардын программасы:

• 21-октябрь, саат 12:00 — К. Молдобасанов атындагы Кыргыз улуттук консерваториясында мастер-класс.
Швейцариялык музыканттар үйлөмө жана урма аспаптар кафедрасынын студенттери менен тажрыйба бөлүшөт. Ушул эле күнү маданий байланыштарды бекемдөөгө багытталган швейцариялык оркестр менен консерваториянын ортосундагы кызматташтык меморандумуна кол коюлат.

• 22-октябрь, саат 19:00 — А. Малдыбаев атындагы Кыргыз улуттук академиялык опера жана балет театрында «Эки тоолуу өлкөнүн обону» аттуу концерт.
Программада La Landwehr de Fribourg репертуарындагы чыгармалар жана кыргыз композиторлорунун эмгектери жаңырат. Кеченин туу чокусу швейцариялык үйлөмө оркестр менен кыргыз улуттук аспаптарында ойногон өнөрпоздордун биргелешкен чыгармасы болмокчу.

Уюштуруучулар белгилегендей, кыргыз салттуу аспаптары Батыш Европанын үйлөмө оркестри менен айкалышта тарыхта биринчи жолу жаңырат.