Кыргызстанда өзгөчө айкалыштагы мамлекеттик номердин сертификатын башка адамга кайра тариздөө эми «Түндүк» мобилдик тиркемеси аркылуу гана жүргүзүлөт. Бул тууралуу Транспорт каражаттарын жана айдоочулук курамды каттоо боюнча мамлекеттик борбору билдирди.

Маалыматка ылайык, эми бул кызмат үчүн аймактык бөлүмдөргө баруу талап кылынбайт. Жол-жобо толугу менен онлайн форматта эки тараптын тең катышуусунда аткарылат.

Маанилүү! Эске салсак, буга чейин «Түндүк» электрондук өз ара аракеттенүү борбору унаалардын мамлекеттик каттоо номерин кайра тариздөө кызматы «Түндүк» тиркемесинде жеткиликтүү болгонун билдирген. Бирок Транспорт каражаттарын жана айдоочулук курамды каттоо боюнча мамлекеттик борбору бул маалыматты төгүндөп, азырынча мобилдик тиркемеде өзгөчө айкалыштагы мамлекеттик номердин сертификатын кайра тариздөө гана жеткиликтүү экенин маалымдады.

Өзгөчө айкалыштагы мамлекеттик номердин сертификатын кантип кайра тариздөөгө болот?

Сатуучу тараптын кадамдары:

• «Түндүк» тиркемесинин «Кызматтар» бөлүмүнөн «Унаа» багытын жана «Мамлекеттик номердик белгини кайра каттоо» кызматын тандоо;
• «Сатуучу» ролун белгилөө;
• өткөрүлүп берилүүчү сертификатты тандоо;
• сатып алуучунун ПИН номерин киргизүү;
• сүрөт аркылуу идентификациядан өтүү;
• арызга электрондук кол тамга (ОЭП) аркылуу кол коюу.

Сатып алуучу тараптын кадамдары:

• тиркемеден ошол эле кызматка кирип, «сатып алуучу» ролун тандоо;
• өткөрүлүп бериле турган сертификатты белгилеп, маалыматтары менен таанышуу;
• сүрөт аркылуу идентификациядан өтүү;
• арызга электрондук кол тамга (ОЭП) менен кол коюу.

Эки тарап тең тиешелүү аракеттерди бүтүргөндөн кийин сертификатты кайра каттоо жараяны аяктайт.