Эртең, 10-сентябрда Бишкекте Кыргызстандын футбол курамасы менен Өзбекстандын оюнун өткөрүү учурунда коомдук тартипти үч миң милиция кызматкери карайт. Бул тууралуу шаардык милициядан билдиришти.
Белгилүү болгондой, аталган беттеш дүйнө чемпионатына тандап алуу оюндарынын алкагында Дөлөн Өмүрзаков атындагы стадиондо өтөт. Оюн саат 20:00до башталат.
Стадиондун кире беришинде милиция кызматкерлери күйөрмандарды текшерип, андан кийин өткөрөт. Милиция оюнга убагында кирүү үчүн жарандарды эки саат эрте келүүгө, текшерүү иштерине түшүнүү менен мамиле жасоого чакырат.
Стадионго шише, желим идиштерди жана пиротехникалык заттарды алып кирүүгө тыюу салынат.
