Иран АКШ президенти Дональд Трамптын Ормуз кысыгын Американын аймагы деп жарыялоо ниетине жооп кайтарды. Ирандын ТИМ башчысынын орун басары Казем Гарибабади кысыкты Тегеран гана көзөмөлдөй турганын билдирди, деп жазат ЖМКлар.

Анын айтымында, Ормуз кысыгын ачуу же жабуу чечимин Иран гана кабыл алат.

«Бул кысык биздин буйругубуз менен гана ачылат же жабылат. Сиздер жеңилүүнүн реалдуулугу менен макул болуп, фантазияга батууну токтотмоюнча, Иран блокаданы сактоону уланта берет», — деп жазды Гарибабади X социалдык тармагына.

Ирандын ТИМ башчысынын орун басары Тегеран коркутууларга же аскердик күч көрсөтүүгө моюн сунбай турганын кошумчалады.

«Ормуз кысыгын твит же авианосец аркылуу, буйрук чыгаруу же шайлоо алдындагы сөз сүйлөө менен басып алуу мүмкүн эмес», — деди дипломат.

Буга чейин Трамп социалдык тармактарда Иранды жеңгенден кийин Ормуз кысыгын Америка Кошмо Штаттарынын аймагы деп жарыялоо ниети бар экенин билдирген. Анын айтымында, АКШ азыр эле кысык аркылуу кемелердин кыймылын иш жүзүндө көзөмөлдөп жатат.

Ошол эле учурда Ирандын тышкы иштер министри Аббас Аракчи Тегеран Вашингтон менен сүйлөшүүлөрдү кайра баштоо боюнча азырынча чечим кабыл ала электигин билдирди. Анын айтымында, Катар жана Пакистан иран тарап менен байланышты улантууда.

Аракчи ошондой эле Ормуз кысыгы аркылуу кемелердин каттамын калыбына келтирүү үчүн АКШ буга чейин макулдашылган шарттарды аткарышы керек экенин белгиледи.