КР Эмгек министрлигинин басма сөз кызматы билдиргендей, Кыргызстан жана Өзбекстан жер аймактарын алмашуу боюнча мындан аркы иш тартибин макулдашты.

Такталгандай, уюштуруу-техникалык маселелерди чечүү боюнча эки өлкөнүн биргелешкен комиссиясынын жыйыны Баткен облусунун Кадамжайында өттү.

Биргелешкен комиссиянын кыргыз бөлүгүн министрдин биринчи орун басары Камчыбек Досматов, өзбек бөлүгүн — Өзбекстандын ички иштер министринин биринчи орун басары Ботир Кудратходжаев жетектейт.

Тараптар аймактарды алмашуу боюнча мурда жетишилген макулдашууларды иш жүзүндө ашырууну карап чыгышты. Атап айтканда, ал жерде жашаган адамдардын жарандыгын аныктоо, аларды көчүрүү, ошондой эле мүлктүк-чарбалык жана башка маселелер талкууланды.

Жыйындын жыйынтыгы менен тараптар мындан аркы биргелешкен иш тартибин макулдашып, жумушчу топтун курамын бекитишти. Анын курамына Кыргызстандын жана Өзбекстандын тармактык министрликтери менен мекемелеринин, ошондой эле жергиликтүү бийлик органдарынын өкүлдөрү кирди.

Жумушчу топтун алдында алмашыла турган аймактардын тургундарынын жарандыгы боюнча маселелерди чечүү жана аларды көчүрүүнү уюштуруу милдети турат.

Мындан тышкары, ал мамлекеттик менчиктеги объектилерди кабыл алуу жана өткөрүп берүү, жарандардын мүлктүк укуктарын жол-жоболоштуруу, жерди пайдалануу жана калкты социалдык коргоо маселелери менен алектенет.

Бул аймактардын тургундары үчүн билим берүү процессинин үзгүлтүксүздүгүн камсыздоого өзгөчө көңүл буруу пландалууда.

Эмгек министрлигинен белгилешкендей, жумушчу топ практикалык иштерге киришти.

Анын өкүлдөрү алмашыла турган аймактарга барып, коюлган милдеттердин аткарылышынын жүрүшү тууралуу биргелешкен комиссиянын теңтөрагаларына маалымат берип жатышат.