Министрлер кабинети ишкердик субъекттерин текшерүүнүн тартибин өзгөртүүнү сунуштоодо. Тиешелүү мыйзам долбоору Жогорку Кеңештин кароосуна киргизилди. Документте текшерүүлөрдү каттоо функциясын ишкердикти өнүктүрүү чөйрөсүндөгү ыйгарым укуктуу органдан прокуратура органдарына өткөрүп берүү сунушталууда.

Мыйзам долбооруна тиркелген маалымкат-негиздемеде учурда текшерүүлөр ишкердикти өнүктүрүү боюнча ыйгарым укуктуу орган менен макулдашуу жол-жобосунан өтөрү белгиленген. Бирок Министрлер кабинетинин пикиринде, азыркы модель көзөмөлдүн жетиштүү деңгээлдеги көз карандысыздыгын камсыздай албайт. Анткени бул орган мыйзам бузууларды токтотуу боюнча жетиштүү ыйгарым укуктарга ээ эмес. Натыйжада макулдашуу көп учурда формалдуу мүнөздө болуп, жол-жоболор кайталанып, бизнеске негизсиз кийлигишүү тобокелдиктери сакталып калууда.

Мыйзам долбоору менен макулдашуу механизмин прокуратура органдарында текшерүүлөрдү милдеттүү түрдө каттоо тартибине алмаштыруу сунушталууда. Ошол эле учурда сөз жаңы функцияны киргизүү жөнүндө эмес. Документтин авторлору «Кыргыз Республикасынын прокуратурасы жөнүндө» конституциялык мыйзамдын 48-беренесине ылайык, прокуратура мыйзамдарда каралган учурларда мамлекеттик органдар жүргүзгөн текшерүүлөрдү каттоо ыйгарым укугуна буга чейин эле ээ экенин эскертишет.

Иштеп чыгуучулар ошондой эле Башкы прокуратура учурда укук коргоо жана салык органдары жүргүзгөн текшерүүлөрдү эсепке алуу үчүн колдонулган «Ишкердик субъекттерин текшерүүлөрдү каттоо» автоматташтырылган маалыматтык системасын пайдаланып жатканын белгилешет. Алардын пикиринде, бул жаңы механизмди кошумча инфраструктура түзбөстөн ишке киргизүүгө мүмкүндүк берет.

Документте төмөнкүлөр сунушталат:

• текшерүүлөрдүн пландарын мыйзам талаптарына, өткөрүү мезгилдүүлүгүнө, ишкерлердин планга киргизилишинин негиздүүлүгүнө жана кайталоолордун жоктугуна текшерүү менен прокуратура органдарында милдеттүү түрдө каттоо;
• ар бир пландуу текшерүүнү буйруктун негизинде каттоо;
• пландан тышкаркы текшерүүлөрдү аларды жүргүзүүгө негиздердин жетиштүүлүгүн баалоо менен каттоо;
• өзгөчө кырдаалдарда текшерүү жүргүзүү мүмкүнчүлүгүн сактап, аны кийин каттоо.

Демилгечилердин пикиринде, мындай система текшерүүлөрдү формалдуу макулдашуудан баш тартууга, жол-жобону көз карандысыз жана ачык-айкын кылууга, бизнеске административдик басымды азайтууга, кайталанган жана негизсиз текшерүүлөрдү жоюуга, ошондой эле мыйзамдуулуктун сакталышына көзөмөлдү күчөтүүгө мүмкүндүк берет.