Эксклюзив

Бишкектеги Политехникалык колледжге имаратты 7 күндө бошотуу тапшырылды — эмне болуп жатат?

18.11.2026 | 14:28
Бишкектеги Политехникалык колледжге имаратты 7 күндө бошотуу тапшырылды — эмне болуп жатат? — Новости Кыргызстана

Reporter.kg басылмасынын редакциясына Кыргызстан эл аралык университетинин (КЭАУ / МУКР) Политехникалык колледжинин студенттеринин ата-энелери кайрылышты. Алар Илим, жогорку билим берүү жана инновациялар министрлиги окуу корпусун жети календардык күндүн ичинде бошотууну талап кылганын билдиришти.

Ата-энелердин айтымында, бул талап окуу жылы кызуу жүрүп жаткан маалда келген. Алар мындай шашылыш көчүрүү окуу жараянын үзгүлтүккө учуратышы мүмкүн деп кооптонушууда, анткени студенттерди так каякка которушары жана алар мындан ары кандай шартта окуусун улантары тууралуу маалымат берилген эмес.

«Окуу жылынын ортосунда миңдеген студенттер менен мугалимдер көчөдө калышы мүмкүн! Бул колледж — өлкөдөгү эң эски окуу жайлардын бири, эки жылдан кийин өзүнүн 100 жылдыгын белгилемек. Бул жерде балдар окуп жатат, өзүнүн тарыхы жана каада-салты бар окуу жайды өз үйүндөй көргөн мугалимдер эмгектенип жатышат», — деп айтылат кайрылууда.

Ата-энелер колледждин кайра түзүлүшүнө жана анын И. Раззаков атындагы Кыргыз мамлекеттик техникалык университетинин (КМТУ) карамагына өтүшүнө каршы эместигин баса белгилешет. Бирок алар көчүүнү алдын ала, окуу жылы башталганга чейин пландаштыруу керек болчу деп эсептешет.

«Биз кайра түзүүгө же мамлекеттик чечимдерге каршы эмеспиз, бирок эмне үчүн бул процесс мынчалык оройлук менен — башка альтернативдүү шарттар түзүлбөстөн, ата-энелердин жана студенттердин пикири эске алынбастан, түздөн-түз окуу процессинин жүрүшүндө жасалып жатат?» — деп нааразы болушат кайрылуунун авторлору.

Алар имаратты бошотуу мөөнөтүн кайра карап чыгууну же студенттерге окуу процессин уюштуруу талаптарына толук жооп берген жабдылган имараттарды бөлүп берүүнү суранышууда.

Мындан тышкары, ата-энелер корпусту тез арада бошотуу чечими кайсы негизде кабыл алынганын, студенттер каякка которуларын жана эмне үчүн бул маселе окуу жылы башталганга чейин чечилбегенин түшүндүрүп берүүнү суранышууда.

Министрликтин документи эмне жөнүндө?

Ата-энелер кайрылууга Илим, жогорку билим берүү жана инновациялар министрлигинин 2026-жылдын 16-ноябрындагы, министрдин орун басары Нарынбек Кубатбек уулу кол койгон жана КЭАУнун жетекчилигине даректелген расмий документин тиркешкен.

Документте Министрлер кабинетинин 2026-жылдын 19-октябрындагы № 708 токтомунун жана Мамлекеттик мүлктү башкаруу боюнча мамлекеттик агенттиктин 2026-жылдын 20-октябрындагы № 1395 буйругунун негизинде Бишкек шаары, Чүй проспектиси, 481 дарегинде жайгашкан Политехникалык колледждин кыймылсыз мүлк объекттери министрликтин оперативдүү башкаруусуна өткөрүлүп берилгени айтылат.

Аталган кыймылсыз мүлктү оперативдүү башкаруу укугу мамлекеттик каттоодон өткөнү белгиленет.

Буга байланыштуу министрлик Чүй проспектисинин боюнда, «Шпиль» тарапта жайгашкан окуу корпусун бошотууну өтүнгөн.

«Министрлик Сизден Чүй проспектисинин боюнда («Шпиль» тарапта) жайгашкан имаратты (окуу корпусун) бир жумалык мөөнөттө (ушул билдирүүнү алган күндөн тартып 7 календардык күндүн ичинде) бошотууну өтүнөт», — деп айтылат документте.

Министрлер кабинетинин токтомунда эмне айтылган эле?

Эске салсак, буга чейин Кыргызстан эл аралык университетинин Политехникалык колледжи юридикалык жак макамын сактоо менен И. Раззаков атындагы КМТУнун курамына өткөрүлүп берилгени кабарланган.

Тиешелүү токтомго Министрлер кабинетинин башчысы Адылбек Касымалиев кол койгон. Эми бул окуу жай «И. Раззаков атындагы Кыргыз мамлекеттик техникалык университетинин Политехникалык колледжи» деп аталат.

Чечим жогорку жана кесиптик орто билим берүү тутумун оптималдаштыруу, ошондой эле мамлекеттик мүлктү жана окуу-материалдык базаны натыйжалуу пайдалануу максатында кабыл алынган.

Токтомго ылайык, Илим, жогорку билим берүү жана инновациялар министрлиги төмөнкүлөрдү аткарууга тийиш:

• колледждин студенттери үчүн окуу процессинин үзгүлтүксүздүгүн камсыз кылуу;
• мыйзамдарга ылайык педагогикалык жана башка кызматкерлер менен эмгек мамилелерин сактап калуу;
• уюштуруу документтерине өзгөртүүлөрдү киргизүү;
• колледждин мамлекеттик мүлкүн, жабдууларын жана документтерин инвентаризациядан өткөрүп, аларды министрликтин оперативдүү башкаруусуна өткөрүп берүү.

Министрлик кандай жооп берди?

Reporter.kg Министрлер кабинетинин токтомунун бардык талаптары аткарылдыбы, атап айтканда, колледждин мүлкү, жабдуулары жана документтери инвентаризацияландыбы, ошондой эле окуу процессинин үзгүлтүксүздүгүн камсыздоо үчүн кандай чаралар көрүлдү деген суроолор менен Илим, жогорку билим берүү жана инновациялар министрлигине комментарий алуу үчүн кайрылды. Бирок материал даярдалып жаткан маалда ведомстводон түшүндүрмө бере алышкан жок, кийинчерээк жооп берүүнү убадалашты.

Ошол эле учурда, ата-энелердин маалыматы боюнча, бүгүн саат 14:00дө министрликтин өкүлдөрү Политехникалык колледждин администрациясы менен жолугушуу өткөрүүнү көздөп жатышат.

Reporter.kg редакциясы окуялардын өнүгүшүнө көз салып турат.

Анара Мамытова

Scroll to Top