Казакстандан Кыргызстанга ташылып келе жаткан 8,5 тонна коон өлкөгө киргизилген жок. Бул тууралуу Айыл чарба министрлиги билдирди.

Өсүмдүктөрдү химиялаштыруу, коргоо жана карантин департаменти тарабынан «Чалдыбар» фитосанитардык көзөмөлдөө постундагы текшерүү учурунда жүктүн жөнөтүүчү жана кабыл алуучу тууралуу маалыматтары дал келбестиги аныкталган. Бул жагдай ЕАЭБдин жана Кыргызстандын фитосанитардык талаптарын бузуу болуп саналат.

Мындан улам жүк Казакстанга кайра кайтарылган. Мекеме өлкөнүн фитосанитардык коопсуздугун камсыздоо максатында мамлекеттик чек араларда көзөмөл иштерин улантылып жатканын билдирди.