Коомдук тамактануучу жайларда тейлөө үчүн өзүнчө акы алууга тыюу салынды. Тыюу салуу 2026-жылдын 1-январынан тарта колдонула баштайт. Бул тууралуу Соода-өнөр жай палатасы билдирди.

Маалыматка ылайык, тиешелүү токтом Министрлер кабинети тарабынан кабыл алынган. Ага ылайык:

• Коомдук тамактануу объекттери мыйзамга каршы келбеген кошумча шарттарды киргизе алышат, бирок тейлөө үчүн пайыз түрүндө акы алууга тыюу салынат.
• Тамак-ашты берүү, сервировка жана персоналдын башка аракеттери үчүн өзүнчө акы алуу тыюу салынат.
• Коомдук тамактануу кызматтарынын бардык чыгымдары керектөөчүгө заказ берерден мурун жеткиликтүү менюда, прайс-баракта же башка документте көрсөтүлгөн баага кошулууга тийиш.
• Төлөнүүчү акыркы сумма алдын ала жарыяланган прайс-баракта көрсөтүлгөн баадан айырмаланбашы керек.

Токтом расмий жарыялангандан кийин күчүнө кирип, 2026-жылдын 1-январынан тарта колдонулат.

Коомдук тамактануу субъекттери 2026-жылдын 1-январына чейин менюларды, прайс-барактарды, кассалык жана программалык системаларды жаңы талаптарга ылайыктап, ар кандай «тейлөө үчүн пайыз» же башка өзүнчө төлөмдөрдү алып салышы керек.

Эгерде менюда же прайс-баракта алдын ала көрсөтүлгөн баа менен акыркы суммада айырма бар болсо, керектөөчүлөр ыйгарым укуктуу органдарга кайрыла алышат.