Кыргыз-Орус Славян университетинин (КОСУ) бүтүрүүчүсү Аяна Алымкулова тарабынан Максат Максутованын жетекчилиги астында түзүлгөн «КОСУнун кайра жаралуусу» («Возрождение КРСУ») кийимдер коллекциясы VI Дүйнөлүк көчмөндөр оюндарынын (ДКӨ) алкагында көрсөтүлөт. Бул тууралуу окуу жайдын басма сөз кызматы билдирет.

«КОСУнун кайра жаралуусу» коллекциясы Алымкулованын бүтүрүүчү квалификациялык иши болгон. Аны жаратууга университеттик кампустун архитектурасы илхам берген.

Автор КОСУ имараттарынын мүнөздүү формаларын жана архитектуралык элементтерин костюмдардын силуэттеринде жана конструктивдик чечимдеринде жаңыча чагылдырган.

Посмотреть эту публикацию в Instagram

Публикация от Reporter.kg (@reporter_kg)

Долбоор социалдык тармактарда кеңири тарады. Коллекция тууралуу жарыяланган посттор 3 миллионго жакын көрүлүп, 300 миңдей «Жагат» (лайк) белгисин топтогон.

Буга чейин «КОСУнун кайра жаралуусу» ДКӨгө байланыштуу сынакка катышкан. Добуш берүүнүн жыйынтыгында Алымкуловага кийинки этапка өтүү үчүн 15 добуш жетпей калган.

Буга карабастан, долбоор уюштуруучулардын көңүлүн өзүнө бурган. Натыйжада Аяна Алымкулова менен Максат Максутова ДКӨ көргөзмөсүнүн алкагында коллекциясын тартуулоого чакырылган.

Иш-чарага КОСУнун үчүнчү курсунун студенти Баястан Исабеков да катышат. Ал окуусун дизайн тармагындагы практикалык иштер менен айкалыштырып, артисттер жана бий жамааттары үчүн сахналык костюмдарды иштеп чыгуу жана тигүү менен алектенет.

Ошентип, эл аралык аянтчада КОСУнун бүтүрүүчүсүнүн да, студентинин да эмгектери тартууланмакчы.

VI Дүйнөлүк көчмөндөр оюндары Кыргызстанда 31-августтан 6-сентябрга чейин өтүүдө.

Reporter.kg — Дүйнөлүк көчмөндөр оюндарынын расмий өнөктөшү.