«Кыргызнефтегаз» ААКнын акционерлеринин жылдык жыйынында ишкананын Директорлор кеңешинин жаңы курамы шайланды. Анын курамына Сагынбек Абдрахманов, Бакыт Егинбаев, Бакыт Саадабаев, Эркин Абдыкалыков жана Кеңешбек Масиров кирди.

Ишкананын маалыматында, Кочкор-Ата шаарында өткөн жыйында ишкананын 2025-жылдагы ишмердүүлүгүнүн жыйынтыктары каралып, 20га жакын маселе талкууланган.

Маалыматка ылайык, 2025-жылы өлкөдө мунай өндүрүүнүн көлөмү 167 миң тоннаны түзгөн. Ал эми жаратылыш газы 27,3 млн м³ көлөмүндө өндүрүлүп, белгиленген план 109%га аткарылган. Ошондой эле жыл ичинде 32 жаңы скважина казылып, анын 22си пайдаланууга берилген. Капиталдык салымдардын көлөмү 1 млрд 677 млн сомду түзгөн.

Мекеменин таза пайдасы 2 млрд 198 млн сомду түзүп, мамлекеттик бюджетке 1 млрд 745 млн сом которулган. Консолидацияланган таза киреше 2,589 млрд сомду түзүп, анын 25 пайызы (647,3 млн сом) дивиденд катары бөлүнгөн.

Жыйында ошондой эле 2026-жылга карата пландар айтылган. Ага ылайык, ушул жылы 165 миң тонна мунай жана 25 млн м³ жаратылыш газын өндүрүү пландалууда. Жалпы киреше 6,77 млрд сом, чыгашалар 3,86 млрд сом деп күтүлүүдө.

Башкармалыктын төрагасы Самсаалы Четимбаевдин билдирүүсүнө ылайык, мунай иштетүүчү заводду модернизациялоого мамлекет тарабынан 2 млрд сом бөлүнөт. Ошондой эле мунай продукцияларын экспорттоого коюлган чектөөлөр алынып, ишкана 2028-жылдан тартып Евро-4 жана Евро-5 стандартындагы күйүүчү майды өндүрүүнү баштоону көздөөдө.