Кыргызстанда Ички иштер министрлигинин 42 объектиси ачылып, милиция кызматкерлерине 102 жаңы автоунаа тапшырылды. Кыргыз милициясынын 102 жылдыгына карата уюштурулган салтанатка президент Садыр Жапаров катышканын мамлекет башчысынын басма сөз кызматы билдирди.

Аймактардагы объектилердин ачылышы онлайн форматта өттү. Алардын катарында райондук жана шаардык ички иштер бөлүмдөрү, бала бакча жана ИИМ системасынын башка имараттары бар. Бишкекте президент ошондой эле борбор калаанын ШИИББнын Кайгуул-күзөт кызматынын полкунун жаңы үч кабаттуу административдик имаратын ачты.

Имаратта «Санариптик патруль» борбору, нөөмөт бөлүгү, кызматтык кабинеттер, ашкана жана казарма бөлмөлөрү жайгаштырылган. Мында милиция кызматкерлеринин күнүмдүк кызматы үчүн бардык шарттар түзүлгөн.

Салтанатта сүйлөгөн сөзүндө Жапаров жаңы объектилерди куруу, автопаркты жаңыртуу жана санариптик технологияларды киргизүү «Коопсуз өлкө» долбоорунун алкагында жүргүзүлүп жатканын белгиледи. Анын айтымында, ИИМдин инфраструктурасын модернизациялоо милициянын ишинин натыйжалуулугун арттырууга жана коомдук коопсуздукту камсыз кылууга багытталган.

Ачылыштан кийин президент полктун аймагын, анын ичинде футбол аянтчасын, автопаркты, кызматтык жана атайын техникаларды көрүп чыкты. Ал ошондой эле ардактуу коноктор китебине эстелик жазуу калтырды.

Иш-чаранын жүрүшүндө ички иштер органдарынын кызматкерлерине 102 жаңы автоунаа, анын ичинде кайгуул машиналары жана атайын техникалар тапшырылды.