Казакстандын өкмөтү чет өлкөлүк жарандардын өлкөгө кирүү, жүрүү жана чыгуу боюнча жаңы эрежелерин бекитти. Токтомго ылайык, визасыз режими бар өлкөлөрдүн, анын ичинде Кыргызстандын жана Евразия экономикалык биримдигинин (ЕАЭБ) башка мамлекеттеринин жарандарына өлкөгө кирүү үчүн электрондук уруксат (ETA) талап кылынат.

Reporter.kg маалымкаты: Кирүүгө электрондук уруксат, же ETA (Electronic Travel Authorization) — визасыз режими бар өлкөлөрдүн жарандары үчүн каралган жана бул документти мамлекеттик QazETA санарип платформасы аркылуу тариздөөгө болот. Бул жаңылык ошондой эле туристтик компанияларга, мейманканаларга жана чет элдик адистерди чакырган уюмдарга да тиешелүү.

Уруксат кагазы улуттук коопсуздук органдары менен макулдашуу боюнча Казакстандын ички иштер органдары тарабынан акысыз берилет.

Аны алуу үчүн чет өлкөлүктөр өлкөгө кирүү пландалган убакытка чейин кеминде 72 саат калганда QazETA санарип платформасы аркылуу арыз бериши керек. Арыз тапшыруу учурунда идентификациядан же аутентификациядан өтүү талап кылынат.

Казакстанга кирүү жана өлкөдөн чыгуу ETA тариздөөдө көрсөтүлгөн паспорт же инсандыгын ырастаган башка документ аркылуу жүргүзүлүшү зарыл. Уруксат берүүдөн баш тартуу же аны жокко чыгаруу жөнүндө кабарламалар ошол эле платформа аркылуу жиберилет.

Ошол эле учурда ETAнын болушу өлкөгө кирүүгө толук кепилдик бербейт: Казакстандын чек ара кызматынын кызматкерлери чет элдик жаранды чек арадан өткөрүүдөн баш тартуу укугун сактап калышат.

Жаңы эрежелер качан күчүнө кирет

Электрондук уруксаттар баскыч-баскычы менен киргизилет:

• 2026-жылдын 1-ноябрынан тарта — Актау эл аралык аэропортунда, ошондой эле Павлодар облусундагы «Урлютобе», Жамбыл облусундагы «Аухатты», Түркстан облусундагы «Атамекен» жана Жетісу облусундагы «Нурлы Жол» автоунаа өткөрүү пункттарында.
• 2027-жылдын 1-январынан тарта — Астана жана Алматы эл аралык аэропортторунда.
• 2027-жылдын 1-мартынан тарта — Казакстандын мамлекеттик чек арасындагы калган бардык өткөрүү пункттарында.
• 2027-жылдын 1-июлунан тарта — электрондук уруксаттын жоктугу чет өлкөлүк жаранды Казакстанга киргизүүдөн баш тартууга негиз болот.

2027-жылдын 1-июлуна чейин жаңы эрежелер түшүндүрүү режиминде иштейт. Өткөрүү пункттарында чет өлкөлүктөргө уруксатты тариздөө зарылдыгы тууралуу маалымдалат, бирок анын жоктугу үчүн гана өлкөгө киргизүүдөн баш тартышпайт.

Кимдерге электрондук уруксат талап кылынбайт

Электрондук уруксат алуудан төмөнкүлөр бошотулат:

• 16 жашка чыга элек балдар;
• 65 жаштагы жана андан улуу курактагы жарандар;
• Казакстанда убактылуу жашоого уруксаты (РВП) же жашоого уруксаты (ВНЖ) бар чет өлкөлүктөр;
• дипломатиялык өкүлчүлүктөрдүн кызматкерлери.

Кыргызстандыктар Казакстанда канча убакыт жүрө алышат

ЕАЭБ өлкөлөрүнүн, анын ичинде Кыргызстандын жарандары үчүн кошумча документтерди тариздебестен жүрүү мөөнөтү мурдагыдай эле калат — ар бир 180 күндүк мезгилдин ичинде 90 календардык күндөн ашпоого тийиш. Ошол эле учурда 90 күндүк чектөө ЕАЭБ жарандарынын айрым категорияларына тиешелүү эмес.

Тактап айтканда, убактылуу жашоого уруксат алган адамдарга, аба, деңиз жана дарыя кемелеринин экипаж мүчөлөрүнө, темир жол бригадаларынын жумушчуларына, ошондой эле эл аралык каттамдарды аткарган оор жүк ташуучу унаалардын жана автобустардын айдоочуларына жеңилдиктер каралган.

Мындан тышкары, өкмөттөр аралык фельдъегердик байланыш кызматкерлерине, шектүүлөрдү, айыпталуучуларды жана соттолгондорду коштоп жүргөн тартип сакчыларына, расмий мамлекеттик делегациялардын мүчөлөрүнө жана аларды коштоп жүргөн адамдарга карата да өзгөчөлүктөр иштейт.

Тизмеге ошондой эле чек ара аралык курулмаларды тейлеген кызматкерлер жана тиешелүү документтери бар болгон учурда, Казакстандан ижарага алынган аймактардын кызматкерлери же тургундары да кирет.

Убактылуу жашоо жана иштөө эрежелери

Токтомго ылайык, Казакстанда убактылуу жүргөн чет өлкөлүктөр, эгер өлкөнүн мыйзамдарында талап кылынса, тиешелүү уруксаты жок эмгек ишмердигин жүргүзө алышпайт.

Убактылуу жашоого уруксат (РВП) кабыл алуучу жеке же юридикалык жактардын жана уюмдардын кайрылуусунун негизинде таризделет.

Мындай кайрылууларды чет өлкөлүктөр менен эмгек келишимин түзгөн иш берүүчүлөр, үй-бүлөсүнө кошулуу максатында келген адамдардын туугандары, чет элдик жарандарды күндүзгү бөлүмгө окууга кабыл алган окуу жайлар жана алар стационардык дарыланып жаткан медициналык мекемелер тапшыра алышат.

Мындан тышкары, чет өлкөлүктөр миссионердик ишмердикти жүргүзгөн диний уюмдардын жана ишкердик жүргүзүү максатында келген жарандар үчүн жергиликтүү аткаруу органдарынын кайрылуулары да убактылуу жашоого уруксат алууга негиз боло алат.

Убактылуу жашоого уруксат алуудан казак визасы менен кирген чет өлкөлүктөр, дипломатиялык жана кызматтык паспорттордун ээлери, ошондой эле 16 жашка чейинки балдар бошотулат.

Ошентип, кыргызстандыктар үчүн визасыз режим жана мурдагы жүрүү мөөнөтү күчүндө калат, бирок жаран жеңилдик берилген категорияларга кирбесе, 2027-жылдын 1-июлунан тарта Казакстанга кирүү үчүн алдын ала таризделген электрондук уруксат талап кылынат.