Кыргызстанда алдамчылар акчаны жана банктык маалыматтарды уурдоо үчүн жасалма QR-коддорду колдонууда. Бул тууралуу Улуттук банк эскертет.

Жөнгө салуучу эки негизги схеманы сүрөттөдү.

Биринчиси – коммуналдык кызматтар жана айып пулдар боюнча жасалма квитанциялар. Кылмышкерлер аларды почта ящиктерине салып же мессенжерлер аркылуу таратышат. Мындай квитанциядагы QR-код расмий төлөм кызматынын интерфейсин көчүргөн фишинг сайтына алып барат же акчаны дароо алдамчылардын капчыгына которот.

Экинчиси – турак жай ээлеринин шериктиктеринин жана үй чаттарынын атынан жазылган кулактандыруулар. Көп кабаттуу үйлөрдүн подъезддерине шериктиктин расмий Telegram-каналына же чатына кошулуу үчүн QR-кодду сканерлөөнү суранган кулактандыруулар илинет. Шилтеме зыяндуу ресурска алып барат, ал аркылуу кылмышкерлер мессенжерлердеги аккаунттарды жана банк карталарынын маалыматтарын уурдашат.

Улуттук банк шектүү шилтемелерге өтүү жана QR-коддорду сканерлөө акчаны жоготууга алып келиши мүмкүн экенин белгилейт. Карыздарды жана айып пулдарды расмий сайттардан жана банктык тиркемелерден гана текшерүү сунушталат.