Жогорку сотко караштуу Сот департаменти түзүлгөндүгүнүн 32 жылдыгын белгиледи. Салтанаттуу иш-чарада Жогорку соттун төрагасы Медербек Сатыев сот имараттарын куруу жана жаңылоо иштери тууралуу айтып берди. Бул тууралуу соттун басма сөз кызматы билдирди.

Жогорку соттун маалыматына ылайык, 2021-жылдан 2025-жылга чейин сот тутумунун жети жаңы объектиси пайдаланууга берилген. Учурда 15 объекттин курулушу жүрүп жатат, дагы бир имарат капиталдык оңдоодон өткөрүлүүдө. Келечекте тогуз жаңы имарат куруу пландалган. Алардын катарында Бишкек шаарында, Ош, Нарын жана Чүй облустарында Адилет үйлөрүн куруу да бар.

Сатыев сот имараттарын курууга жана жаңылоого, материалдык-техникалык базаны чыңдоого, соттордун үзгүлтүксүз иштешин жана сот адилеттигинин жеткиликтүүлүгүн камсыздоого департамент кызматкерлеринин кошкон салымын белгиледи.

«Сот адилеттиги — укуктук мамлекеттин бекем негизи жана мыйзам үстөмдүгүнүн башкы кепилдиги. Соттор өз милдеттерин сапаттуу жана өз убагында аткарышы үчүн зарыл болгон уюштуруучулук, материалдык-техникалык жана инфраструктуралык шарттарды түзүүдө Сот департаментинин өзгөчө ролу бар», — деди ал.

Анын айтымында, соттордун ишинин ийгилиги материалдык базага гана эмес, ар бир кызматкердин кесипкөйлүгүнө, жоопкерчилигине жана ак ниеттүүлүгүнө да байланыштуу.

Соттор кеңешине караштуу Сот администрациясы эгемендүүлүк алгандан кийин, сот-укуктук реформанын алкагында, президенттин 1994-жылдын 1-ноябрындагы жарлыгы менен түзүлгөн. 1996-жылдын 21-майында ал Сот департаментине кайра уюштурулган. Иш-чарада мекеменин сот тутумун уюштуруучулук жактан камсыздоо боюнча ишинин жыйынтыгы чыгарылды. Бир катар кызматкерлер мамлекеттик жана ведомстволук сыйлыктар менен сыйланышты.

Иш-чарага Жогорку соттун төрагасынын кеңешчиси Руслан Мырзалимов, Сот департаментинин директору Бакыт Курманалиев, борбордук аппараттын кызматкерлери жана облустук башкармалыктардын жетекчилери катышты.