Чаткал районунун акими жана ИИБ башчысы коррупцияга шектелип кармалды

Кыргызстандын Ички иштер министрлиги (ИИМ) Чаткал районунун акими Алтынбек Сенирбаевди жана райондук ИИБ башчысы Таалайбек Турсунбаевди коррупцияга шектеп кармады.
Тергөөнүн маалыматына караганда, алардын калкалоосу астында райондун аймагында мыйзамсыз алтын казылып турган.
ИИМ билдиргендей, 2026-жылдын ноябрь айынын башынан тартып бир топ адам алдын ала сүйлөшүп алып, Жалал-Абад облусунун Чаткал районундагы Куру-Тегерек тилкесинде чачынды алтынды мыйзамсыз казууну уюштурган. Тергөөнүн версиясы боюнча, бул ишмердүүлүк айрым кызмат адамдарынын көмөгү менен жүргүзүлгөн.
Алтын казуу үчүн фронталдык жүктөгүч, насостук жана жууп-тазалоочу жабдуулар колдонулган. Ошол эле учурда иштер жер казынасын пайдаланууга лицензиясы жана башка зарыл уруксат берүүчү документтери жок жүргүзүлгөн.
Тергөө казылып алынган алтын мыйзамда белгиленген тартипти кыйгап өтүү менен сатылганын аныктады. Топтун катышуучулары аны сатуудан түшкөн ири суммадагы каражаттын мыйзамсыз келип чыгышын жашырып, аны легалдаштырууга аракет кылышкан.
ИИМдин маалыматы боюнча, түшкөн каражаттын бир бөлүгү акча которуу системасы аркылуу Чаткал районунун акимине жана райондук ИИБ башчысына которулуп турган. Тергөө эсептегендей, акча мыйзамсыз алтын казууну калкалоо үчүн арналган.
Ыкчам-тергөө иш-чараларынын натыйжасында төрт адам кармалды:
- Чаткал районунун акими А. С., 1975-жылы туулган;
- Чаткал районунун ИИБ башчысы Т. Т., 1972-жылы туулган;
- Э. А., 1988-жылы туулган;
- Ж. З., 1979-жылы туулган.
Кармалгандардын баарына карата камакка алуу түрүндөгү бөгөт коюу чарасы тандалды.
Бул факт боюнча КР Кылмыш-жаза кодексинин 336-беренесинин («Коррупция») 1-бөлүгү боюнча кылмыш иши козголду.
Тергөө мыйзамсыз казылып алынган алтынды сатуу каналдарын аныктап, аны сатуудан түшкөн акча каражаттарынын кыймылына көз салууда, ошондой эле баалуу металлды казууну жана сатууну уюштурууга башка адамдардын катыштыгы болушу мүмкүндүгүн тактап жатат.