Кыргызстандык гимнасткалар көркөм гимнастика боюнча эл аралык турнирде байгелүү орундарды ээлешти. Мелдешке Кыргызстандын спортчуларынан тышкары Сербия, Хорватия, Болгария жана Италиядан келген гимнасткалар да катышты.

38 катышуучунун арасынан Аяна Абдрахманова обруч менен көнүгүү аткарууда экинчи орунду ээледи. 17 команданын арасындагы командалык эсепте Аяна Абдрахманова менен Ада Шкуркодон турган Bigser 2 командасы үчүнчү орунду алды.

2016-жылы туулган гимнасткалар арасында Дамелия Апасова обруч менен көнүгүү аткарууда 18 катышуучунун ичинен экинчи орунду ээледи. Ал эми 2017–2018-жылдары туулган гимнасткалар арасында Раяна Абдылдаева 21 катышуучунун ичинен үчүнчү болду.

Дагы алты спортчу — Амелия Трубина, Нелли Токтоназарова, Тамина Абдусаматова, Эсмира Басылбаева, Айкөл Сулайманова жана София Хусаинова — өздөрүнүн чакан топторунда алдыңкы ондукка киришти.

Команданы машыктыруучу Агата Быковская жардамчысы Айдай Амангелдиева менен бирге даярдады.