Министрлер кабинети мамлекеттик жана муниципалдык кызматтар жөнүндө колдонуудагы мыйзамдын ордуна «Мамлекеттик органдар жана жергиликтүү өз алдынча башкаруу органдары көрсөткөн кызматтар жөнүндө» жаңы мыйзам кабыл алууну сунуштоодо.

Мыйзам долбооруна тиркелген маалымкат-негиздемеге ылайык, документ мамлекеттик кызмат системасынын натыйжалуулугун жогорулатуу жана бюрократияны азайтуу боюнча президенттин жарлыгын ишке ашыруу максатында иштелип чыгып, мамлекеттик жана муниципалдык кызматтарды көрсөтүү системасын жаңылоого багытталган.

Долбоордун авторлору азыркы мыйзам жарандардын ыңгайлуулугуна эмес, административдик жол-жоболорго басым жасаган эски бюрократиялык моделди сактап калганын белгилешет. Мындан тышкары, учурдагы система санариптештирүүнү, ведомстволор аралык өз ара аракеттенүүнү жана калктын муктаждыктарын жетиштүү деңгээлде эске албайт.

Мыйзам долбоору кызмат көрсөтүүнүн сервистик жана санариптик моделине өтүүнү карайт. Документтин негизги максаттары төмөнкүлөр:

• ашыкча административдик жол-жоболорду кыскартуу;
• кызматтарды санариптик жана проактивдүү форматта көрсөтүүгө артыкчылык берүү;
• жарандардын мамлекеттик кызматтарга тең жеткиликтүүлүгүн камсыз кылуу;
• ачык-айкындуулукту жана отчеттуулукту жогорулатуу;
• кызматтардын бирдиктүү реестрин түзүү.

Маалымкатта бүгүнкү күндө жарандар жана бизнес өкүлдөрү дагы эле көп сандагы кагаз документтерге, кызмат көрсөтүү процесстеринин үзгүлтүксүз эместигине жана өзгөчө алыскы аймактарда кызматтардын жеткиликтүүлүгүнүн чектелишине туш болуп жатканы белгиленген.

Долбоордо калктын социалдык жактан аялуу катмарларына өзгөчө көңүл бурулган. Пенсионерлерге, көп балалуу үй-бүлөлөргө, майыптыгы бар адамдарга жана башка муктаж жарандарга айрым мамлекеттик жана муниципалдык кызматтар үчүн жеңилдиктерди берүү же төлөмдөн бошотуу мүмкүнчүлүгүн сактап калуу сунушталууда.

Мыйзам долбоорундагы негизги жаңылыктардын бири — кызматтарды проактивдүү форматта көрсөтүү. Бул айрым учурларда мамлекет жарандын өзүнчө кайрылуусуз эле кызматтарды автоматтык түрдө көрсөтө алат дегенди билдирет.

Мисал катары бала төрөлгөндөн кийинки документтерди тариздөө көрсөтүлгөн. Ага ылайык, төрөт үйү «Түндүк» системасы аркылуу электрондук билдирүү жөнөтөт. Андан соң кошумча арызсыз эле баланын туулгандыгы тууралуу күбөлүгү, ИННи даярдалып, «Балага сүйүнчү» жөлөк пулун дайындоо процесси автоматтык түрдө башталат. Ата-энелерге төлөм дайындалганы тууралуу билдирүү гана келет.

Мындан тышкары, мыйзам долбоору айрым кызматтарды көрсөтүүгө аутсорсинг механизми аркылуу жеке секторду тартуу мүмкүнчүлүгүн да карайт.

Ошондой эле мамлекеттик жана муниципалдык кызматтардын толук жана системалаштырылган тизмесин камтыган Бирдиктүү кызматтар реестрин түзүү сунушталууда. Ошол эле учурда жергиликтүү өз алдынча башкаруу органдары өз аймагынын өзгөчөлүктөрүн эске алуу менен кошумча кызматтарды бекитүү укугун сактап калат.

Министрлер кабинетинин пикиринде, мыйзамдын кабыл алынышы кызмат көрсөтүү системасын Санариптик кодекске шайкеш келтирип, мамлекеттик кызматтарды алуу процессин жарандар үчүн ыңгайлуу, ыкчам жана муктаждыктарга багытталган кылууга мүмкүндүк берет.