2027-жылы Министрлер Кабинети мамлекеттик инвестициялык долбоорлорду каржылоо үчүн 33 миллиард 539 миллион сом насыя тартууну пландоодо. Бул тууралуу 2027-жылга жана 2028–2029-жылдардын пландык мезгилине республикалык бюджеттин долбоорунда айтылат.

Мындан тышкары, 2027-жылы ОПЕКтин Эл аралык өнүктүрүү фондунан дагы 2 миллиард 643 миллион сом насыя түшөрү күтүлүүдө.

2028-жылы мамлекеттик инвестициялык долбоорлор үчүн 63 миллиард 971 миллион 800 миң сом, ал эми 2029-жылы 38 миллиард 751 миллион 600 миң сом насыя тартуу пландалууда.

Ошол эле учурда мурда берилген насыялардын кайтарылган каражаттары да бюджетке түшүшү керек. 2027-жылы 6 миллиард 166 миллион 100 миң сом, 2028-жылы 6 миллиард 170 миллион 500 миң сом, ал эми 2029-жылы 6 миллиард 349 миллион 400 миң сом кайтарылары күтүлүүдө.

Бирок Финансы министрлиги бюджеттин киреше бөлүгү боюнча пландарды аткарууга тоскоол болушу мүмкүн болгон тобокелдиктер бар экенин эскертүүдө.

Тактап айтканда, экономика болжолдонгондон жай өссө, алтын өндүрүүнүн көлөмү, анын ичинде Кумтөр кениндеги өндүрүш азайса же дүйнөлүк рынокто алтындын баасы төмөндөсө, бюджетке пландалгандан аз каражат түшүшү мүмкүн.

Ошондой эле Евразия экономикалык биримдигине мүчө өлкөлөрдөн жана башка мамлекеттерден товарлардын импортунун кыскарышы да тобокелдик катары белгиленген. Бул бюджетке түшүүчү салыктардын жана башка кирешелердин азайышына алып келиши мүмкүн.