Чүй облусунун Беловодское айылында «Клубмалина» ишканасынын муздаткыч комплекси ишке киргизилди. Объект Айыл чарба министрлигинин «Айыл чарбасында климаттын өзгөрүшүнө туруктуу кошумча нарк чынжырчаларын өнүктүрүү» долбоорунун алкагында ачылды. Бул тууралуу министрликтин басма сөз кызматы билдирди.

Долбоордун жалпы наркы 110 млн сомду түзөт. Анын 75 млн сому Азия өнүктүрүү банкы каржылаган «Айыл чарбасындагы климаттын өзгөрүшүнө туруктуу кошумча нарк чынжырчаларын өнүктүрүү» долбоорунан бөлүнүп, калган каражат ишкананын өздүк эсебинен каржыланган.

Ишкананын аянты 1 миң 500 чарчы метрди түзүп, 20дан ашык жумуш орду ачылган. Комплекс айыл чарба продукциясын сактоо, кайра иштетүү жана экспорттук дараметин жогорулатуу максатында курулган.