Мамлекеттик салык кызматы «Товарлардын, жумуштардын жана кызмат көрсөтүүлөрдүн каталогу» модулунун үстүндө иштөөнү улантууда. Ал жаңыланган ЭСФ 2.0 электрондук эсеп-фактуралар системасынын жана ЕАЭБден товарларды импорттоодо колдонулуучу «Жыйынды пост» маалыматтык системасынын негизги бөлүктөрүнүн бири болот.

Ишкерлер 2027-жылдын 1-мартына чейин өз товарларынын, жумуштарынын жана кызмат көрсөтүүлөрүнүн аталыштарын жаңы каталогдогу тизмелер менен салыштырып чыгышы керек. Бул талап Министрлер кабинетинин 2026-жылдын 16-сентябрындагы № 705-т тескемесинин 5-пунктунда каралган. Анда «Электрондук эсеп-фактура 2.0» модулун пилоттук түрдө киргизүү белгиленген.

Эгер керектүү товар же кызмат каталогдо жок болсо, салык төлөөчү жеке кабинети аркылуу аны тизмеге кошуу боюнча арыз жөнөтө алат. Бул үчүн толук жана так маалыматтарды көрсөтүү зарыл. Модулду колдонуу боюнча атайын нускама да даярдалган.

2026-жылдын 1-ноябрына карата каталогго 4 миллиондон ашык актуалдуу позиция катталган. Алардын 4 083 932си товарлар, 1 183ү жумуштар жана кызмат көрсөтүүлөр.

Модулдун максаты — товарлар жана кызмат көрсөтүүлөр тууралуу маалыматтарды иретке келтирүү, алардын аталыштарын бирдейлештирүү жана электрондук документ жүгүртүүнү жакшыртуу.

Тескемеде ЭСФ 2.0 системасын пилоттук түрдө ишке киргизүү да каралган. Анын жыйынтыгы боюнча системаны жаңы каталог менен бирге толук кандуу пайдаланууга өткөрүү пландалууда. Кийинчерээк ал учурдагы электрондук эсеп-фактуралар системасын алмаштырат. 2027-жылдан тарта МСК каталогду «Жыйынды пост» системасы менен байланыштырууну пландап жатат.

Салык кызматы ишкерлерди, айрыкча импорттоочуларды товарлардын аталыштарын салыштыруу иштерин акыркы мөөнөткө калтырбоого чакырат.