Жогорку Кеңеште электрондук документ жүгүртүүгө өтүүнү мыйзам менен бекемдеп, документтердин көбүн кагаз түрүндө милдеттүү түрдө кайталап берүүдөн баш тартуу сунушталууда. Тиешелүү өзгөртүүлөрдү «Кыргыз Республикасынын Жогорку Кеңешинин Регламенти жөнүндө» мыйзамга киргизүү сунушталды.

Иш жүзүндө парламент санариптик форматка өтүүнү буга чейин эле баштаган. Февраль айында Жогорку Кеңештин төрагасы болуп шайлангандан көп өтпөй Марлен Маматалиев парламентти санариптештирүү жана кагаз колдонууну азайтуу иштин негизги багыттарынын бири болорун билдирген. Ошондой эле депутаттарга жыйындардын материалдарын алып, документтерди электрондук форматта окуу үчүн 90 планшет берилерин айткан.

Учурда депутаттар материалдар менен иштөөдө планшеттерди колдонуп жатышат. Сентябрдын башында Маматалиев парламентке баяндама жасоо үчүн келген мамлекеттик органдардын өкүлдөрүн да кагаз документтерден баш тартып, электрондук форматка өтүүгө чакырган.

Эми бул өзгөртүүлөрдү Жогорку Кеңештин Регламентинде бекемдөө сунушталууда. Мыйзам долбоору мыйзам долбоорлоруна түзөтүүлөрдү жана сунуштарды, депутаттык суроо-талаптарды жана аларга жоопторду, арыздарды, билдирүүлөрдү, өзгөчө пикирлерди жана башка документтерди кагаз түрүндө да, электрондук форматта да берүүгө мүмкүнчүлүк түзөт. Мында бир эле документти эки форматта бир убакта тапшыруу талап кылынбайт.

Электрондук документтер электрондук цифралык кол тамга менен бекитилет.

Бирок парламент кагаз документтерден толугу менен баш тартпайт. Кызматтык пайдаланууга арналган жана мамлекеттик сырды камтыган документтер үчүн мыйзамдарда белгиленген атайын документ жүгүртүү тартиби сакталат.

Мыйзам долбоорунун авторлору өзгөртүүлөр кагазга, документтерди басып чыгарууга, көчүрүүгө жана сактоого кеткен чыгымдарды азайтууга мүмкүндүк берет деп эсептешет. Мындан тышкары, электрондук формат документтерди каттоону жана жөнөтүүнү тездетип, аларды издөөнү жеңилдетип, материалдардын жоголуп кетүү тобокелдигин азайтышы керек.