Түркиянын Невшехир провинциясында «Түрк дүйнөсүнүн орток баалуулугу — Чыңгыз Айтматов» аттуу конференция жана сүрөт көргөзмөсү болуп өттү. Гюрай жер астындагы керамика музейинде уюштурулган бул маданий иш-чара Кыргыз Республикасынын эгемендүүлүгүнүн алдыдагы 35 жылдыгына карата өткөрүлдү.

Иш-чаранын демилгечилери катары «EkoAvrasya Vakfı» фонду, «TÜRKSİT» түрк дүйнөсүнүн жарандык коомдор аралык кызматташтык ассоциациясы жана Чыңгыз Айтматов институту чыгышты.

Жолугушуунун жүрүшүндө Кыргызстандын элчиси Руслан Казакбаев залкар жазуучунун мурасынын маанилүүлүгүн баса белгиледи. Анын айтымында, Айтматовдун чыгармалары жалпы руханий байлык болуп саналат жана бүткүл түрк дүйнөсүнүн элдерин бириктирген маанилүү маданий көпүрө катары кызмат кылат.