Кыргызстандын ички иштер министри Улан Ниязбеков Грузияга иш сапары менен барып, аталган өлкөнүн премьер-министри Ираклий Кобахидзе менен жолугушту. Бул тууралуу Ички иштер министрлигинин басма сөз кызматы билдирди.

Жолугушууда тараптар Кыргызстан менен Грузиянын ортосундагы кызматташтыкты өнүктүрүү маселелерин, анын ичинде коопсуздук жана туруктуулукту камсыз кылуу, заманбап коркунучтарга биргелешип каршы туруу тууралуу талкуулашкан.

Ошондой эле сүйлөшүүлөрдө тажрыйба алмашууну жана практикалык өз ара аракеттенүүнү өнүктүрүүнүн маанилүүлүгү айтылган.

Мындан тышкары Улан Ниязбеков Грузиянын ички иштер министри Сулхан Леванович менен сүйлөшүүлөрдү өткөргөн. Анда трансулуттук уюшкан кылмыштуулукка, алдамчылыкка жана баңгизаттарды мыйзамсыз жүгүртүүгө каршы күрөшүү боюнча кызматташтыктын келечеги каралган.

Өзгөчө көңүл Грузиянын аймагында ишкердик менен алектенген Кыргызстандын жарандарынын укуктарын жана мыйзамдуу кызыкчылыктарын коргоо маселелерине бурулган.

Ошондой эле кыргыз тарап Грузиянын укук коргоо тутумун санариптештирүү жана мамлекеттик кызматтарды жакшыртуу боюнча тажрыйбасын үйрөнүүгө даяр экенин билдирген.