Ысык-Көл облусунда эс алуу жайларынын биринде 24 жаштагы жигит каза болду. Бул тууралуу ИИМдин басма сөз кызматы билдирди.

Маалыматка ылайык, окуя 16-августта саат 10:25 чамасында Чолпон-Ата шаарында болгон. Маркум Бишкектен кесиптештери менен эс алууга келип, эс алуу жайдын аймагында белгисиз адамдар менен пикир келишпестиктен улам жаракат алып, каза болгон.

Окуя болгон жерден далил буюмдар алынган. Факт Кылмыш-жаза кодексинин 130-беренеси (“Адам өлтүрүү”) менен катталып, экспертизалар дайындалды.

“Шектүү катары 14, 17 жана 19 жаштагы үч жаран кармалып, соттун чечими менен эки айга камакка алынды. Тергөө иштери уланууда”,-деп айтылат маалыматта.