Жалал-Абад шаарында 4 жашар кызды зордуктоого шектелип 35 жаштагы жаран кармалды. Бул тууралуу облустук милициянын басма сөз кызматынан билдиришти.
Белгилүү болгондой, 24-июнда саат 18:30дар чамасында милицияга шаардагы көп кабат үйлөрдүн биринин алдында бейтааныш адам 4 жашар кызды зордуктаганы тууралуу маалымат түшкөн. Жерине ыкчам-тергөө тобу барып, далил буюмдар алынган.
Бул факты боюнча «зордуктоо» беренеси менен кылмыш иши козголуп, соттук-медициналык жана соттук-биологиялык экспертизалар дайындалган.
Шектүү катары 35 жаштагы Б.Х. аттуу жаран кармалган. Соттун чечими менен ал тергөө аяктаганча 2 айга камакка алынган.
Учурда тергөө иштери жүрүүдө.
Милициянын басма сөз кызматы шектүүнүн сүрөтүн берүүдөн баш тартып, анын сүрөтү аларда да жана тергөөдө да жок экенин жүйөө келтирди.
