Москвада кармалып, Кыргызстанга алынып келген активист Илгиз Шаменов бүгүн, 29-октябрда эки айга камалды. Бул тууралуу Биринчи май райондук сотунан билдиришти.
Соттун чечими менен ал 20-декабрга чейин №1 тергөө абагында камакта болот.
Шаменов билдиргендей, ага «массалык башаламандыктарга даярдык көрүү» беренеси боюнча иш козголгон.
Эскерте кетсек, Илгиз Шаменов Москвада 27-октябрда кармалып, 28-октябрда Кыргызстанга алынып келген.
Мындан мурдаарак Москвада кармалган Жогорку Кеңештин мурдагы депутаты Орозайым Нарматова эки айга камакка алынган.
22-октябрда Кемпир-Абад суу сактагычын колдоо комитети түзүлгөн. Анын курамына активисттер, саясатчылар жана депутаттар кирген. 23-октябрда массалык тинтүү иштери башталып, 20дан ашык адам кармалып, алар 48 саатка камалган.
24-октябрда Бишкек шаарында Кемпир-Абад суу сактагычынын астындагы жердин Өзбекстанга берилишине жана активист, саясатчылардын камалышына каршы жөө жүрүш өткөн. 25-октябрда Биринчи май райондук соту тарабынан алар эки айга камакка алынган.
Активист жана саясатчылардын камалышы боюнча ИИМ түшүндүрмө берип, Кылмыш-жаза кодексинин 36-278-беренеси «Массалык баш аламандыктарды уюштурууга даярдануу» менен козголгон кылмыш иши боюнча тергөө амалдары жүргүзүлүп жатканын билдирген.
Биздин Телеграм каналыбызга катталыңыз
