Министрлер кабинети чет элдик номурлуу автоунааларды мыйзамдаштыруунун убактылуу тартибине өзгөртүүлөрдү киргизди. Токтомго өкмөт башчы Адылбек Касымалиев кол койду.
Ага ылайык, кыймылдаткычынын көлөмү 2 миң куб. см чейинки унааларды мыйзамдаштыруу үчүн 50 миң сом төлөнөт. Ал эми көлөмү 2 миң куб. см жогору болгон унаалардын ээси 100 миң сом төлөшү керек.
Мындан тышкары автоматташтырылган маалыматтык системада автоунаанын чек арадан өткөнү тууралуу маалымат жок болсо, автоунаа 2024-жылдын 30-декабрында өткөн деп эсептелет.
Эске салсак, ушул жылдын 1-апрелден тарта чет өлкөлөрдөн ташып келинген жана мамлекеттик каттодон өтпөгөн автоунааларды мыйзамдаштыруу башталган.
