1-апрелден тарта чет өлкөлөрдөн ташып келинген жана мамлекеттик каттодон өтпөгөн автоунааларды мыйзамдаштыруу башталат. Бул тууралуу Транспорттук каражаттарды жана айдоочулук курамды каттоо боюнча мамлекеттик агенттик билдирди.

Каттоо ушул жылдын 1-октябрына чейин аталган агенттиктин аймактардагы бардык бөлүмдөрүндө жүргүзүлөт.

Маалыматта айтылгандай, 2024-жылдын 31-декабрына чейин өлкө аймагына алып келинген, чет мамлекеттердин каттоо номерлери бар, бирок укук белгилөөчү документтери жок автоунаалар мыйзамдаштырылат.

Мындай унааларга 10-аймактын мамлекеттик номерлери берилет. Аларды сатууга, өлкөдөн чыгарууга жана алар менен такси кызматын көрсөтүүгө тыюу салынат.

Автоунааны мыйзамдаштыруу үчүн төмөнкүлөр керек:

• Евразиялык экономикалык биримдиктин (ЕАЭБ) аккредиттелген реестрине кирген лаборатория тарабынан берилген транспорт каражатынын конструкциясынын коопсуздук күбөлүгү (СБКТС);
• Визуалдык кароо жана фотофиксация үчүн унаанын өзү;
• Укуктуу орган тарабынан бекитилген формадагы арыз;
• Транспорттук каражаттарды жана айдоочулук курамды каттоо жаатындагы орган тарабынан бекитилген форма боюнча арыз;
• Паспорт;
• Транспорт каражатын каттоо тууралуу күбөлүк (эгер бар болсо);
• Унаага болгон менчик укугун тастыктаган документ (эгер бар болсо);
• Автоунаанын издөөдө жок экендиги, күрөөгө коюлбагандыгы, соттук талашта эместиги, камакка алынбагандыгы жана такси катары колдонулбай тургандыгы тууралуу милдеттенме;
• Чек ара көзөмөл органдары тарабынан берилген транспорт каражатынын мамлекеттик чек арадан өткөндүгүн тастыктаган маалымкат. Эгер мындай маалымкат жок болсо, унаанын өлкөгө кирген датасы 2024-жылдын 31-декабры деп эсептелет;
• Мамлекеттик каттоо, атайын бланкалык продукция жана мамлекеттик номер белгилери үчүн төлөмдөрдүн квитанциялары (төлөм электрондук системалар аркылуу жүргүзүлүшү мүмкүн);
• Каттоо, атайын бланкалык продукция жана мамлекеттик номер белгилери үчүн төлөмдөрдүн квитанциялары (төлөм электрондук төлөм системалары аркылуу жүргүзүлүшү мүмкүн);
• Мыйзамдаштыруу үчүн 100 миң сом өлчөмүндөгү төлөмдүн квитанциясы.